**भेंडवळच्या घटमांडणीचे २०२६ चे भाकित: राजा खुर्चीवर कायम, पण तणावात; संरक्षणावर दबाव, पाऊस अनियमित अन् शेतकऱ्यांसाठी आव्हान**

**भेंडवळच्या घटमांडणीचे २०२६ चे भाकित: राजा खुर्चीवर कायम, पण तणावात; संरक्षणावर दबाव, पाऊस अनियमित अन् शेतकऱ्यांसाठी आव्हान** 

**KDM NEWS प्रतिनिधी बुलढाणा जिल्ह्यातील जळगाव-जामोद तालुक्यातील पूर्णा नदीकाठी वसलेल्या भेंडवळ गावात ३५० वर्षांची अखंड परंपरा आजही जिवंत आहे. चंद्रभान महाराज वाघ यांनी सुरू केलेल्या या घटमांडणीमध्ये अक्षय तृतीयेच्या मुहूर्तावर मातीचा घट, पाणी, विविध खाद्यपदार्थ आणि १८ प्रकारची धान्ये मांडली जातात. दुसऱ्या दिवशी सूर्योदयापूर्वी वाघ कुटुंबातील वंशज सारंगधर महाराज आणि पुंजाजी महाराज यांनी या बदलांचे निरीक्षण करून यंदाचे भाकित जाहीर केले.

**देशाचे नेतृत्व**  

देशाचा राजा (पंतप्रधान) आपल्या पदावर कायम राहील. सत्तेत मोठा बदल होणार नाही, राजकीय स्थैर्य टिकेल. मात्र, राजाला प्रचंड मानसिक व राजकीय तणावाचा सामना करावा लागेल. आंतरराष्ट्रीय दबाव, विरोधकांची नाराजी आणि कारभारातील आव्हानांमुळे नेतृत्वावर दबाव वाढेल.

**युद्ध व संरक्षण परिस्थिती**  

देशाची संरक्षण व्यवस्था कमकुवत दिसेल. संरक्षण खात्यावर मोठा ताण येईल. सीमेवर शत्रूंच्या कारवाया व कुरघोडीची शक्यता आहे. मसूर धान्याच्या स्थितीमुळे परकीय घुसखोरी व तणावाचे संकेत मिळाले आहेत. इराण-अमेरिका सारख्या जागतिक संघर्षांचा भारतावर अप्रत्यक्ष परिणाम होऊ शकतो.

**पाऊसमान**  

मान्सून अनियमित राहील. जूनमध्ये पावसाची दमदार सुरुवात होईल. जुलैमध्ये पाऊस सर्वसाधारण असेल. ऑगस्ट व सप्टेंबरमध्ये पावसाचे प्रमाण कमी राहील. काही भागांत महापुराचा धोका व अवकाळी पावसामुळे पिकांची नासाडी होण्याची शक्यता आहे. एकूण पाऊस चित्र संमिश्र राहील.

**शेतकऱ्यांसमोरील संकट व पीक परिस्थिती**  

शेतकऱ्यांसाठी हे वर्ष आव्हानात्मक ठरेल. पिकांवर रोगराईचा प्रादुर्भाव वाढेल.  

- **भरपूर उत्पादन व चांगले भाव**: कापूस, तांदूळ, तीळ, बाजरी.  

- **सर्वसाधारण उत्पादन**: ज्वारी, तूर, मूग, उडीद, मटकी, जवस, वाटाणा.  

पावसाच्या अनियमिततेमुळे पेरण्या मागे-पुढे होऊ शकतात आणि काही पिकांचे नुकसान अपरिहार्य आहे. अर्थव्यवस्थेवरही ताण असल्याने शेतमालाच्या भावात चढ-उतार राहतील.

**अर्थव्यवस्था**  

देशाची तिजोरीवर ताण राहील. करंजी फुटल्याचे चिन्ह आर्थिक स्थिती ढासळण्याचे संकेत देते. बाजारात मंदीचे वातावरण, महागाईचा फटका बसण्याची शक्यता. एकूणच अर्थव्यवस्था मजबूत राहणार नाही.

**नैसर्गिक संकट**  

पुरी गायब झाल्याचे चिन्ह पृथ्वीवर मोठ्या नैसर्गिक आपत्तीचे संकेत देते. पावसासोबत अतिवृष्टी किंवा दुष्काळासारख्या लहरीपणामुळे संकट वाढू शकते.

भेंडवळची ही परंपरा शेतकऱ्यांसाठी मार्गदर्शक मानली जाते. यंदाचे भाकित पाऊस, पीक व राजकारण या तीनही आघाड्यांवर सावधगिरीचा इशारा देत आहे. शेतकरी वर्ग आता या अंदाजानुसार पेरणी व नियोजन करेल.

KDM NEWS प्रतिनिधी