**नारी शक्ती वंदन अधिनियमाच्या अपयशानंतर पंतप्रधान मोदींचे राष्ट्राला संबोधन**

**नारी शक्ती वंदन अधिनियमाच्या अपयशानंतर पंतप्रधान मोदींचे राष्ट्राला संबोधन** 

**KDM NEWS प्रतिनिधी**नवी दिल्ली, १८ एप्रिल २०२६: नारी शक्ती वंदन अधिनियमाशी संबंधित १३१व्या संविधान संशोधन विधेयकाला लोकसभेत अपयश आल्यानंतर अवघ्या २४ तासांत पंतप्रधान नरेंद्र मोदी यांनी रात्री ८.३० वाजता राष्ट्राला संबोधित केले. सुमारे ३० मिनिटांच्या या थेट भाषणात त्यांनी देशातील महिलांना स्पष्टपणे माफी मागितली. “आमचे सर्व प्रयत्न असूनही नारी शक्ती अधिनियमातील सुधारणा करता आल्या नाहीत. यासाठी मी देशातील सर्व मातांना, भगिनींना आणि नारी शक्तीला माफी मागतो,” असे ते म्हणाले.

पंतप्रधान मोदींनी भाषणाच्या सुरुवातीलाच नाराजी व्यक्त केली. “देशातील कोट्यवधी महिलांनी काल संसदेकडे डोळे लावले होते. विधेयकाचा पराभव झाल्यावर काही पक्ष टाळ्या वाजवत, बेंच वाजवत साजरा करत होते. हे केवळ टेबल ठोकणे नव्हते, तर महिलांच्या स्वाभिमानावर घाला घालणे होते. एक महिला अनेक गोष्टी विसरू शकते, पण आपला अपमान कधीही विसरत नाही,” असे ते म्हणाले.

विधेयकाचा उद्देश स्पष्ट करताना मोदी म्हणाले, “हे विधेयक कोणाच्याही हक्कावर घाला घालणारे नव्हते. उलट, देशाच्या लोकसंख्येच्या निम्म्या महिलांना दीर्घकाळ प्रलंबित असलेला हक्क देणारे होते. यापूर्वी ४० वर्षांपासून महिलांना आरक्षण मिळायला हवे होते. हे ‘महा यज्ञ’ प्रामाणिकपणे करण्याचा प्रयत्न होता. पण काही पक्षांच्या स्वार्थी राजकारणामुळे नारी शक्तीला आणि देशाला मोठा फटका बसला.”

विरोधकांवर जोरदार टीका करताना ते म्हणाले, “काँग्रेस, डीएमके, टीएमसी, समाजवादी पक्ष आणि त्यांचे सहयोगी पक्षांनी हे ‘नारी शक्ती वंदन’ विधेयकाचा गर्भपात केला आहे. हे पक्ष स्वतःच्या कुटुंबीय राजकारणासाठी महिलांना पुढे येऊ द्यायला तयार नाहीत. महिलांच्या बाहेरच्या नेतृत्वाला ते भितात. त्यामुळे त्यांनी महिलांचा हक्क लुटला आणि नंतर साजरा केला. देशातील महिलांना हे कधीही माफ होणार नाही. त्या या पक्षांना योग्य उत्तर देतील.”

मोदींनी पुढे सांगितले, “आम्हाला ६६ टक्के मतं मिळाली नाहीत, पण नारी शक्तीचे १०० टक्के आशीर्वाद आम्हाला आहेत. मी स्पष्टपणे सांगतो- ज्यांनी काल महिलांच्या हक्काला विरोध केला, त्यांना २१व्या शतकातील महिलांनी जवळून पाहिले आहे. त्यांच्या हेतू समजले आहेत. त्यांचा हा पापाचा भार त्यांना भोगावा लागेल.”

भाषणात पंतप्रधानांनी सरकारच्या भूमिकेची पुनरावृत्ती केली. “महिलांना विकासाच्या प्रवासात भागीदार बनवणे हा आमचा ध्यास आहे. २०२९ पर्यंत आरक्षण लागू करण्यासाठी आम्ही कटिबद्ध आहोत. विरोधकांच्या या स्वार्थी राजकारणामुळे देशाला आणि महिलांना नुकसान झाले, पण आम्ही हा प्रयत्न सोडणार नाही,” असे ते म्हणाले.

या संबोधनात मोदींनी विरोधकांना ‘संविधान आणि नारी सशक्तीकरणाचे गुन्हेगार’ म्हटले. काँग्रेसला ‘सुधारणा-विरोधी पक्ष’ आणि ‘परजीवी’ असे संबोधित केले. विधेयकामुळे राज्यांना समान विकास मिळणार होता, पण काही पक्षांनी तांत्रिक मुद्दे उपस्थित करून महिलांचा हक्क रोखला, अशी टीका त्यांनी केली.

पंतप्रधानांच्या या भाषणाने राजकीय वातावरण तापले असून, महिलांच्या राजकीय प्रतिनिधित्वाच्या मुद्द्यावर पुन्हा एकदा चर्चा सुरू झाली आहे.

KDM NEWS प्रतिनिधी