**सोलापूर जिल्ह्यात पेट्रोल-डिझेल पुरवठा सुरळीत; सात दिवसांचा बफर स्टॉक उपलब्ध**

**सोलापूर जिल्ह्यात पेट्रोल-डिझेल पुरवठा सुरळीत; सात दिवसांचा बफर स्टॉक उपलब्ध** 

**KDM NEWS प्रतिनिधी सोलापूर, २६ मे:** जिल्ह्यात पेट्रोल, डिझेल व एलपीजीचा पुरवठा पूर्णपणे सुरळीत ठेवण्यासाठी बीपीसीएल, एचपीसीएल आणि आयओसीएल या कंपन्यांना जिल्हाधिकारी एस. कार्तीकेयन यांनी स्पष्ट निर्देश दिले आहेत. जिल्ह्यात पाच ते सात दिवस पुरेल इतका बफर स्टॉक उपलब्ध असून, नियमित पुरवठाही सुरू असल्याचे सांगण्यात आले आहे.

जिल्हाधिकारी कार्यालयात २५ मे रोजी आयोजित बैठकीत जिल्हाधिकारी कार्तीकेयन म्हणाले, “काही पेट्रोल विक्रेत्यांवर कंपन्यांनी एकतर्फी विक्री मर्यादा घातल्याच्या तक्रारी आल्या आहेत. जिल्हा प्रशासनाच्या परवानगीशिवाय असे कोणतेही बंधन घालू नये.” अशा बंधनांमुळे नागरिकांमध्ये भीतीचे वातावरण निर्माण होऊ शकते, असे त्यांनी स्पष्ट केले.

नागरिकांनी अफवांवर विश्वास ठेवू नये आणि अनावश्यक साठेबाजी करू नये, असे आवाहन जिल्हाधिकाऱ्यांनी केले. ग्रामीण भागातही मागणीप्रमाणे पुरवठा होत असल्याचे त्यांनी सांगितले. CNG पुरवठ्यातही वाढ करण्याच्या सूचना कंपन्यांना देण्यात आल्या.

**पंढरपूर येथे जिल्हाधिकाऱ्यांची तपासणी**  

आज जिल्हाधिकारी कार्तीकेयन यांनी पंढरपूर येथील एका पेट्रोल पंपाची प्रत्यक्ष तपासणी केली. सर्व बाबी व्यवस्थित आढळून आल्या. कृत्रिम टंचाई किंवा काळाबाजार रोखण्यासाठी सर्व तहसीलदार, प्रांताधिकारी आणि तालुका दंडाधिकाऱ्यांना सतर्क राहण्याचे निर्देश देण्यात आले आहेत.

**संयुक्त भरारी पथकांची स्थापना**  

पेट्रोल पंपांवर रांगा लागल्याचा फायदा घेऊन काळाबाजार होण्याची शक्यता लक्षात घेता, प्रत्येक तालुक्यात संयुक्त भरारी पथक स्थापन करण्यात आले आहेत. या पथकात तहसीलदार (समन्वयक), पोलिस निरीक्षक (कायदा व सुव्यवस्था) आणि नायब तहसीलदार (तांत्रिक तपासणी) यांचा समावेश आहे. मंडळ अधिकारी, पुरवठा निरीक्षक व ग्राम महसूल अधिकारीही या पथकात आहेत.

**पेट्रोल पंपांचे कॅलिब्रेशन तपासणी**  

वजन व मापे उपायुक्तांना जिल्ह्यातील सर्व पेट्रोल पंपांचे कॅलिब्रेशन (मशीनची अचूकता) तपासून दुरुस्त करण्याचे निर्देश देण्यात आले आहेत.

बैठकीला जिल्हा पुरवठा अधिकारी संतोष सरडे, गॅस कंपनीचे समन्वयक रघुकुमार, बीपीसीएल, एचपीसीएल, आयओसीएल व आयएमसीएल यांच्या वरिष्ठ अधिकाऱ्यांसह विविध अधिकारी उपस्थित होते. जिल्हाधिकाऱ्यांनी विक्रेत्यांच्या अडचणीही जाणून घेतल्या.

KDM NEWS प्रतिनिधी