**लग्नाला अवघे ११ दिवस बाकी, 'तुमची मुलगी मला शोभत नाही' म्हणत पीएसआयने कुटुंबाला पिस्तुल दाखवून धमकी**

**लग्नाला अवघे ११ दिवस बाकी, 'तुमची मुलगी मला शोभत नाही' म्हणत पीएसआयने कुटुंबाला पिस्तुल दाखवून धमकी** 

**KDM NEWS प्रतिनिधी बीड, २७ मे २०२६ :** बीड जिल्ह्यातील मातोरी गावात एक धक्कादायक घटना समोर आली आहे. लग्नाची सर्व तयारी पूर्ण झालेल्या एका तरुणीच्या कुटुंबीयांना नवरदेव असलेल्या पोलिस उपनिरीक्षकाने (पीएसआय) लग्नाला नकार दिला. 'मला तुमची मुलगी शोभत नाही' असे म्हणत त्याने पिस्तुल दाखवून धमकी दिल्याचा आरोप करण्यात आला आहे.

पीएसआय पवन निंबाळकर यांच्यावर चकलांबा पोलीस ठाण्यात फसवणुकीचा गुन्हा दाखल करण्यात आला आहे. मुलीच्या वडिलांच्या फिर्यादीनुसार, दोघांचे लग्न निश्चित झाले होते. साखरपुडा झाला होता. लग्नासाठी लाखो रुपये खर्च करून सोने, कपडे आणि इतर साहित्य खरेदी करण्यात आले होते. मंडपही सजवण्यात आला होता. मात्र लग्नाच्या अवघ्या काही दिवस आधी नवरदेवाने अचानक लग्नाला नकार दिला.

फिर्यादीनुसार, निंबाळकर यांनी मुलीच्या कुटुंबीयांना बोलावून 'तुमची मुलगी मला शोभत नाही' असे सांगितले आणि पिस्तुल दाखवत धमकी दिली. कुटुंबाने कष्टाने गोळा केलेली रक्कम वाया गेल्याने त्यांना मोठा आर्थिक आणि मानसिक धक्का बसला आहे. मुलीच्या नातेवाईकांनी सांगितले की, निंबाळकर यांनी अनेक मुलींना अशाच पद्धतीने फसवले असल्याचेही त्यांना समजले आहे.

या प्रकरणी पोलिसांनी दोन्ही बाजूंच्या फिर्यादी दाखल केल्या आहेत. निंबाळकर यांच्या भावानेही उलट फिर्याद दाखल करून मुलीच्या कुटुंबीयांनी चुकीची माहिती दिल्याचा दावा केला आहे. पोलिस आता दोन्ही बाजूंचा तपास करत आहेत.

ही घटना बीड जिल्ह्यात चर्चेचा विषय बनली आहे. पोलिस अधिकारी असलेल्या व्यक्तीकडून अशा प्रकारची वर्तणूक धक्कादायक असल्याचे स्थानिकांनी सांगितले. वरिष्ठ पोलिस अधिकाऱ्यांनी प्रकरण गांभीर्याने घेतले असून तपास सुरू आहे.

KDM NEWS प्रतिनिधी