**बार्शी तालुक्यातील पिंपळवाडी येथे दुचाकीने धडक देऊन ६२ वर्षीय महिलेचा मृत्यू**

**बार्शी तालुक्यातील पिंपळवाडी येथे दुचाकीने धडक देऊन ६२ वर्षीय महिलेचा मृत्यू** 

**KDM NEWS प्रतिनिधी बार्शी (सोलापूर),** १९ मे २०२६: पिंपळवाडी (ता. बार्शी) येथे बार्शी-येरमाळा रस्त्यावर काल रात्री ८.३० वाजण्याच्या सुमारास एका वेगाने येणाऱ्या दुचाकीने रस्ता ओलांडणाऱ्या ६२ वर्षीय महिलेला जोरदार धडक दिली. या अपघातात महिलेचा जागीच मृत्यू झाला. अपघातात दुचाकीचालकही जखमी झाला आहे.

मृत महिला अयोध्या शिवराज चौधरी (वय ६२, रा. पिंपळवाडी) अशी आहे. तिचा मुलगा रामराजे शिवराज चौधरी (वय ४२) यांनी पांगरी पोलीस ठाण्यात दिलेल्या फिर्यादीनुसार, १८ मे २०२६ रोजी रात्री अयोध्या चौधरी आपल्या चुलत भावजयी प्रभावती यांच्या घरी गप्पा मारण्यासाठी जात होत्या. त्या रस्ता ओलांडत असताना बार्शीकडून येरमाळाकडे जाणाऱ्या काळ्या-लाल रंगाच्या हिरो होंडा एचएफ डिलक्स दुचाकीने (क्र. MH 13 DB 1637) त्यांना धडक दिली.

धडक इतकी जोरदार होती की अयोध्या चौधरी रस्त्यावर पडल्या आणि त्यांना डोके, उजवा हात व पायाला गंभीर जखमा झाल्या. रक्तस्त्राव सुरू झाला. दुचाकीचालक कालिदास सुरेश काळे यालाही अपघातात मार लागला. स्थानिकांनी लगेचच दोघांना अमर चौधरी यांच्या चारचाकी वाहनातून बार्शीतील जगदाळे मामा हॉस्पिटलमध्ये नेले. मात्र उपचारापूर्वीच अयोध्या चौधरी यांचा मृत्यू झाल्याचे डॉक्टरांनी सांगितले.

मृतदेहाचे पोस्टमॉर्टेम ग्रामीण रुग्णालय, बार्शी येथे करण्यात आले. रामराजे चौधरी यांनी अपघाताची माहिती देताना सांगितले की, दुचाकीचालकाने रस्त्याच्या परिस्थितीकडे दुर्लक्ष करून वेगाने वाहन चालवले होते.

पांगरी पोलीस ठाण्यात या प्रकरणी कालिदास सुरेश काळे यांच्याविरुद्ध दुर्लक्ष्याने वाहन चालवून मृत्यूस कारणीभूत झाल्याबाबत फिर्याद दाखल करण्यात आली आहे. पोलिस अधिक तपास करत आहेत.

KDM NEWS प्रतिनिधी