**"पोलिओमुक्त सोलापूरचा निर्धार: उद्या 'दोन थेंब' आरोग्याचे; आपल्या पाल्याला लसीकरण केंद्रावर नक्की न्या!"**

"पोलिओमुक्त सोलापूरचा निर्धार: उद्या 'दोन थेंब' आरोग्याचे; आपल्या पाल्याला लसीकरण केंद्रावर नक्की न्या!" 

**KDM NEWS प्रतिनिधी सोलापूर, दि. २७ जून २०२६** — जिल्ह्यातील ४.३६ लाखांहून अधिक बालकांना पोलिओपासून संरक्षण देण्यासाठी राष्ट्रीय पल्स पोलिओ लसीकरण मोहीम उद्या रविवार, २८ जून २०२६ रोजी राबविण्यात येणार आहे. जिल्हाधिकारी एस. कार्तिकेयन आणि जिल्हा परिषदेचे मुख्य कार्यकारी अधिकारी कुशल जैन यांच्या मार्गदर्शनाखाली ही मोहीम पार पडेल.

जिल्हा आरोग्य अधिकारी डॉ. सतीश कोपूरवाड यांनी सांगितले की, ० ते ५ वर्षांखालील ४,३६,५७२ बालकांना पोलिओचे दोन थेंब पाजण्याचे उद्दिष्ट आहे. यासाठी जिल्ह्यात ५,५७० ग्रामीण, ५७० शहरी आणि ३७३ महानगरपालिका अशा एकूण ६,५१३ लसीकरण बूथ उभारण्यात आले आहेत. लसीकरणासाठी ७,२२२ कर्मचारी नियुक्त करण्यात आले असून, वैद्यकीय अधिकारी, तालुका आरोग्य अधिकारी व जिल्हा-तालुका स्तरावरील पर्यवेक्षक यांच्याकडून देखरेख केली जाईल.

अतिरिक्त जिल्हा आरोग्य अधिकारी डॉ. नंदकिशोर घाडगे यांनी माहिती देताना सांगितले की, बस स्टॅन्ड, रेल्वे स्टेशन, बाजारपेठा, विटभट्ट्या, साखर कारखाने, यात्रा-जत्रा आणि लग्न समारंभ यासारख्या सार्वजनिक ठिकाणी विशेष व्यवस्था करण्यात आली आहे. भटक्या वसाहती, ऊसतोड कामगारांच्या वसाहतीतील बालकांसाठी मोबाईल टीम कार्यरत राहतील.

**मोहीम यशस्वी करण्यासाठी सूचना**  

जिल्हाधिकाऱ्यांनी कोल्ड चेन व्यवस्था अबाधित ठेवणे, वाहनांची उपलब्धता, जनजागृती आणि इतर विभागांशी समन्वय साधण्याचे निर्देश दिले आहेत. मोहिमेदरम्यान ० ते ५ वयोगटातील एकही बालक लसीकरणापासून वंचित राहणार नाही, यासाठी कठोर दक्षता घेण्यात येणार आहे.

**पालकांसाठी आवाहन**  

आरोग्य विभागाने पालकांना आवाहन केले आहे की, आपल्या सर्व ५ वर्षांखालील बालकांना उद्या सकाळी ८ ते संध्याकाळी ५ या वेळेत जवळच्या बूथवर घेऊन जा. पूर्वी दिलेल्या लसींचा विचार न करता हा अतिरिक्त डोस देणे आवश्यक आहे. शाळांमार्फत प्रभात फेऱ्या काढून जनजागृती करण्यात येत आहे.

ही मोहीम यशस्वी झाल्यास सोलापूर जिल्हा पोलिओमुक्त ठेवण्यास मोठी मदत होईल. पालक, शिक्षक आणि नागरिकांनी सक्रिय सहभाग घ्यावा, असे आरोग्य विभागाचे आवाहन आहे.

KDM NEWS प्रतिनिधी