**भीमेचा ‘जलसम्राट’ जाळ्यात! बेगमपूरमध्ये २५ किलोचा महाकाय कटला मासा**

**भीमेचा ‘जलसम्राट’ जाळ्यात! बेगमपूरमध्ये २५ किलोचा महाकाय कटला मासा** 

**KDM NEWS मोहोळ (प्रतिनिधी):** मोहोळ तालुक्यातील मत्स्यव्यवसायासाठी प्रसिद्ध बेगमपूर येथे भीमा नदीत शुक्रवारी (२० जून) मासेमारी करताना २५ किलो वजनाचा विशाल कटला मासा जाळ्यात अडकला. स्थानिक मच्छीमारांच्या मते, बेगमपूरच्या इतिहासात एवढ्या मोठ्या आकाराचा कटला प्रथमच सापडला असल्याचा दावा करण्यात येत आहे. या घटनेमुळे परिसरात खळबळ उडाली असून, माशाची माहिती पसरताच बेगमपूर मच्छी मार्केटमध्ये नागरिकांची मोठी गर्दी झाली.

मच्छीमार **सिद्धू भोई** व त्यांच्या सहकाऱ्यांनी सकाळी भीमा नदीत जाळे टाकले होते. जाळे ओढताना असामान्य वजन जाणवल्याने सर्वांनी मिळून मोठ्या प्रयत्नाने ते किनाऱ्यावर आणले. जाळ्यात २५ किलोचा कटला मासा अडकलेला पाहून उपस्थित आश्चर्यचकित झाले. दुष्काळी परिस्थितीत पाण्याची पातळी कमी असूनही हा महाकाय मासा सापडणे दुर्मिळ मानले जात आहे.

या माशाची बातमी वाऱ्यासारखी पसरताच बेगमपूर मच्छी मार्केटमध्ये नागरिकांनी गर्दी केली. अनेकांनी माशासोबत छायाचित्रे व व्हिडिओ काढून हा क्षण मोबाइलमध्ये कैद केला. मासा मार्केटमध्ये आणल्यानंतरही उत्सुकता कायम राहिली.

**सिद्धू भोई** म्हणाले, “आम्ही वर्षानुवर्षे भीमा नदीत मासेमारी करतोय, पण इतका मोठा कटला जाळ्यात अडकण्याचा हा आयुष्यातील अविस्मरणीय अनुभव आहे. सर्व सहकाऱ्यांच्या मदतीने तो किनाऱ्यावर आणता आला.” या मोहिमेत शंकर भोई, सुनील भोई, दशरथ भोई, महादेव भोई, सुभाष भोई, आकाश भोई, दत्ता भोई, रोहित भोई, संजय भोई आदींनी सहभाग घेतला.

बेगमपूर हे मत्स्यव्यवसायाचे प्रमुख केंद्र आहे. स्थानिक ज्येष्ठ मच्छीमारांच्या म्हणण्यानुसार, भीमा नदीत मोठे मासे अधूनमधून सापडतात, मात्र २५ किलोचा कटला ही अभूतपूर्व घटना आहे. या घटनेमुळे मच्छीमारांमध्ये नवीन उत्साह निर्माण झाला असून, भीमा नदीच्या मत्स्यसंपदेची चर्चा पुन्हा रंगली आहे.

ही घटना बेगमपूरच्या मत्स्यव्यवसायाच्या इतिहासात सुवर्णक्षण म्हणून नोंदली जाईल.

KDM NEWS प्रतिनिधी