**सोलापूर: बीएलओंच्या कामात हलगर्जी खपवून घेतली जाणार नाही - जिल्हाधिकारी एस. कार्तीकेयन**

**सोलापूर: बीएलओंच्या कामात हलगर्जी खपवून घेतली जाणार नाही - जिल्हाधिकारी एस. कार्तीकेयन** 

**KDM NEWS प्रतिनिधी सोलापूर, दि. २ (प्रतिनिधी):** भारत निवडणूक आयोगाच्या निर्देशानुसार सोलापूर जिल्ह्यात मतदार यादीच्या विशेष सखोल पुनरिक्षण (SIR) कार्यक्रमास ३० जूनपासून सुरुवात झाली आहे. हा कार्यक्रम २९ जुलैपर्यंत राबवला जाणार असून, जिल्हाधिकारी एस. कार्तीकेयन यांनी सर्व बीएलओना हे काम राष्ट्रीय कर्तव्य समजून काटेकोरपणे पार पाडण्याचे आवाहन केले आहे.

जिल्ह्यातील ११ विधानसभा मतदारसंघात एकूण **३९ लाख ३८ हजार ६३१** मतदार आहेत. या कार्यक्रमासाठी **३७२३ बीएलओ** नियुक्त करण्यात आले आहेत. जिल्हाधिकारी कार्यालयाच्या सभागृहात झालेल्या आढावा बैठकीत कार्तीकेयन यांनी स्पष्ट केले की, बीएलओना SIR कामाव्यतिरिक्त कोणतीही इतर जबाबदारी देण्यात येऊ नये. शिक्षण विभागातील सुमारे अडीच हजारांहून अधिक शिक्षक बीएलओ म्हणून काम करत आहेत. त्यांना इतर कोणतेही काम देऊ नये, असा स्पष्ट निर्देश देण्यात आला.

**मुख्य सूचना:**

- प्रत्येक बीएलओने दररोज किमान १०० ते १५० EPIC फॉर्म मतदारांना वितरित करावेत.

- ज्या ४६ बीएलओंनी अद्याप प्रशिक्षण घेतले नाही किंवा साहित्य घेतले नाही, त्यांनी त्वरित पूर्ण करावे.

- कामात हलगर्जीपणा आढळल्यास किंवा वरिष्ठ अधिकारी अडथळा निर्माण केल्यास निवडणूक आयोगाच्या निर्देशानुसार कठोर कारवाई केली जाईल.

जिल्हाधिकारी म्हणाले, “सोलापूर हा राज्यातील मतदारसंख्येनुसार पाचवा सर्वात मोठा जिल्हा आहे. या कार्यक्रमात कोणत्याही प्रकारची हलगर्जी खपवली जाणार नाही.”

बैठकीला प्रभारी उपजिल्हा निवडणूक अधिकारी लक्ष्मण कसेकर, उपजिल्हाधिकारी अभय भोसले, प्रांताधिकारी सदाशिव पडदूने, सुमित शिंदे, जिल्हा पुनर्वसन अधिकारी सुशांत बनसोडे, निवडणूक तहसीलदार विभुते, जिल्हा आरोग्य अधिकारी डॉ. सतीश कोपूरवाड, महिला व बाल विकास विभागाचे प्रसाद मिरकले आदी उपस्थित होते. शिक्षणाधिकारी, तहसीलदार, गटविकास अधिकारी तसेच इतर अधिकारी ऑनलाइन माध्यमातून जोडले होते.

प्रभारी उपजिल्हा निवडणूक अधिकारी लक्ष्मण कसेकर यांनी SIR कार्यक्रमाची अंमलबजावणी कशी करावी याबाबत सविस्तर मार्गदर्शन केले. रोजच्या प्रगतीचा आढावा घेण्याच्या सूचना देण्यात आल्या.

KDM NEWS प्रतिनिधी