*बीडची जिद्द! पतीच्या निधनानंतर संकटांशी दोन हात; ४७ वर्षीय रमाबाईंनी साडीत आणि अनवाणी पायांनी जिंकली मॅरेथॉन*

*बीडची जिद्द! पतीच्या निधनानंतर संकटांशी दोन हात; ४७ वर्षीय रमाबाईंनी साडीत आणि अनवाणी पायांनी जिंकली मॅरेथॉन* 

KDM NEWS प्रतिनिधी बीड, १ सप्टेंबर : संकटांशी मुकाबला करत पोटाची खळगी भरणाऱ्या आणि लेकरांच्या भविष्यासाठी अजेय संघर्ष करणाऱ्या एका माउलीने आपल्या जिद्दीच्या बळावर साऱ्या महाराष्ट्राचे लक्ष वेधून घेतले आहे. पतीच्या निधनानंतर लेकरांच्या शाळेची फीस भरण्यासाठी पैशांची चणचण भासत असताना, ४७ वर्षीय रमाबाई यांनी चप्पलविना, अगदी अनवाणी पायांनी आणि साडी नेसूनच मॅरेथॉन स्पर्धेत भाग घेतला. विशेष म्हणजे, आपल्या अदम्य साहसाच्या जोरावर त्यांनी ही स्पर्धा जिंकत तीन हजार रुपयांचे बक्षीसही आपल्या नावावर केले.

बीड जिल्ह्याच्या या प्रेरणादायी महिलेची कहाणी आज संपूर्ण राज्यात कौतुकाचा विषय ठरत असून, तिच्या या संघर्षमय विजयाने अनेकांच्या डोळ्यात पाणी आणले आहे.

रमाबाई यांच्या कुटुंबावर काही काळापूर्वी दुःखाचा डोंगर कोसळला. पतीच्या अकाली निधनानंतर संपूर्ण कुटुंबाची जबाबदारी त्यांच्या खांद्यावर आली. दोन वेळच्या अन्नाची भ्रांत असताना मुलींच्या शिक्षणाचा आणि शाळेच्या फीसचा प्रश्न बिकट बनला होता. मात्र, अशा कठीण प्रसंगीही त्यांनी हार मानली नाही. परिस्थितीशी झुंज देत त्यांनी जिद्द सोडली नाही.

मॅरेथॉन स्पर्धेची माहिती मिळताच रमाबाई यांनी त्यात सहभाग घेण्याचा निर्णय घेतला. पायात साधी चप्पलही नव्हती, अंगावर नेहमीप्रमाणे साडी होती; पण मनात प्रचंड जिद्द आणि डोळ्यांसमोर लेकरांचे भविष्य होते. त्यांनी न डगमगता अनवाणी पायांनीच धावण्यास सुरुवात केली आणि आपल्या लक्ष्याला गवसणी घातली.

स्पर्धेत घवघवीत यश मिळवल्यानंतर आणि तीन हजार रुपयांचे पारितोषिक जिंकल्यानंतर रमाबाई अत्यंत भावूक झाल्या. प्रसारमाध्यमांशी बोलताना त्या म्हणाल्या, “मी दररोज माझ्या मुलांच्या भविष्यासाठी जगण्याशी संघर्ष करत धावत असते… पण आज मी माझ्या स्वतःच्या आणि लेकरांच्या संघर्षासाठी धावले!”

रमाबाईंच्या या प्रेरणादायी प्रवासाने सिद्ध केले की, परिस्थिती कितीही बिकट असली तरी मनातील जिद्द आणि आत्मविश्वासाच्या बळावर प्रत्येक संकट मात देता येते. त्यांच्या या यशाचे संपूर्ण महाराष्ट्रातून कौतुक होत आहे.

KDM NEWS प्रतिनिधी