**एफडीएकडून क्विक कॉमर्सवर कठोर कारवाई; १४ आस्थापनांचे परवाने निलंबित**
**एफडीएकडून क्विक कॉमर्सवर कठोर कारवाई; १४ आस्थापनांचे परवाने निलंबित**
KDM NEWS प्रतिनिधी मुंबई/पुणे: महाराष्ट्र अन्न व औषध प्रशासनाने (एफडीए) क्विक कॉमर्स प्लॅटफॉर्म्सशी संबंधित आस्थापनांवर मोठी कारवाई केली आहे. १३ ऑगस्ट रोजी राज्यभरात ८६ आस्थापनांची विशेष तपासणी करण्यात आली. यात ब्लिंकिट, झेप्टो आणि इन्स्टामार्टशी संबंधित डार्क स्टोअर्स व गोदामांचा समावेश होता.
तपासणीत अन्न सुरक्षा व स्वच्छतेचे गंभीर उल्लंघन आढळल्याने १४ आस्थापनांचे अन्न व्यवसाय परवाने तात्काळ निलंबित करण्यात आले. यापैकी पाच ब्लिंकिट, पाच झेप्टो, दोन इन्स्टामार्ट, एक भागवती स्टोअर्स आणि एक स्विन्स्टा एंटरप्रायझेस (इन्स्टामार्टशी संबंधित) यांचे परवाने निलंबित आहेत. ६० आस्थापनांना सुधारणा नोटीस बजावण्यात आली असून एका आस्थापनेला तात्पुरते काम बंद करण्याचे आदेश देण्यात आले. कोणताही परवाना कायमचा रद्द करण्यात आलेला नाही.
**मुख्य त्रुटी**
गोदामांमध्ये कॉकरोच, उंदीर विष्ठा, सरडे यांचा प्रादुर्भाव, कुजलेल्या भाज्या, मुदत संपलेले खाद्यपदार्थ, अस्वच्छ साठवणूक, तापमान नियंत्रण नसणे (चिलर रूमचे तापमान निर्धारित मर्यादेपेक्षा जास्त), कर्मचाऱ्यांची वैद्यकीय तपासणी नसणे, पाण्याचे चाचणी अहवाल गायब असणे, कचरा व्यवस्थापन व स्वच्छतेची कमतरता आढळली. काही ठिकाणी अन्न व बिगर-अन्न वस्तू एकत्र ठेवल्या होत्या तसेच एफआयएफओ/एफईएफओ नियमांचे पालन होत नव्हते.
**प्रमुख आढळलेल्या घटना**
- मालाड (वेस्ट) येथील ब्लिंकिट गोदामात चिलर तापमान ६ अंश सेल्सिअस आढळले (निर्धारित मर्यादेपेक्षा जास्त). सुमारे ४० कर्मचाऱ्यांची वैद्यकीय प्रमाणपत्रे नव्हती.
- घाटकोपर येथील ब्लिंकिट गोदामात कुजलेल्या भाज्या, कॉकरोच प्रादुर्भाव, अस्वच्छ रॅक व खराब फ्लोअरिंग आढळले.
- पुण्याच्या लोहेगाव येथील झेप्टो आउटलेटमध्ये मुदत संपलेले अन्न साठवलेले होते व कोल्ड चेन व्यवस्थापनात त्रुटी होत्या.
- पुण्याच्या वारजे येथील स्विन्स्टा युनिटमध्ये कॉकरोच प्रादुर्भाव व अस्वच्छता आढळली.
- बांद्रे, अंधेरी, मुलुंड, जोगेश्वरी येथील झेप्टो-इन्स्टामार्ट संबंधित आस्थापनांमध्ये उंदीर विष्ठा, सरडे, तापमान नियंत्रण नसणे व स्वच्छतेची कमतरता आढळली.
- सातारा जिल्ह्यातील कराड येथील ब्लिंकिट सेंटरमधील डिलिव्हरी ऑपरेशन्स तात्पुरते बंद करण्यात आले. तेथे अनेक रायडर्स्कडे वैद्यकीय प्रमाणपत्रे व ओळखपत्रे नव्हती.
एफडीए आयुक्त तुकाराम मुंढे यांच्या मार्गदर्शनाखाली ही मोहीम राबविण्यात आली. अन्न सुरक्षा व मानके कायदा, २००६ अंतर्गत कारवाई करण्यात आली आहे. सुधारणा झाल्यानंतर व पुनर्तपासणीत समाधानकारक अहवाल आल्यास निलंबन उठविण्याबाबत निर्णय घेतला जाईल, असे अधिकाऱ्यांनी सांगितले.
ग्राहकांच्या आरोग्याशी thr थेट संबंधित असलेल्या या आस्थापनांमध्ये स्वच्छता व तापमान नियंत्रण नसल्याने एफडीएने कठोर भूमिका घेतली आहे.
KDM NEWS प्रतिनिधी
टिप्पण्या