*तीन पिढ्यांचे वैराख्य संपले! कव्हे गावातील हजारे परिवारांमधील ४२ वर्षांचा वाद पोलिसांच्या मध्यस्थीने मिटला*

*तीन पिढ्यांचे वैराख्य संपले! कव्हे गावातील हजारे परिवारांमधील ४२ वर्षांचा वाद पोलिसांच्या मध्यस्थीने मिटला* 

**KDM NEWS प्रतिनिधी बार्शी** | कव्हे गावातील सागर हजारे आणि सत्यवान हजारे यांच्या परिवारांमधील तब्बल ४२ वर्षांपासून सुरू असलेला संघर्ष अखेर संपला. तीन पिढ्यांमध्ये चालत आलेल्या या वैरामध्ये गंभीर गुन्हे दाखल झाले होते. त्यात कलम ३०७ सारख्या प्रयत्नपूर्वक हत्येच्या प्रकरणांचाही समावेश होता. वर्षानुवर्षे न्यायालयीन खटले चालत राहिल्याने दोन्ही बाजू त्रस्त झाल्या होत्या.

बार्शी तालुका पोलीस स्टेशनचे प्रभारी अधिकारी सहाय्यक पोलीस निरीक्षक अक्षय सोनवणे यांनी दोन्ही परिवारांशी थेट संवाद साधला. कायदेशीर परिणाम, भविष्यातील अडचणी आणि या वादामुळे झालेले नुकसान स्पष्टपणे समजावून सांगितले. पोलीस उपनिरीक्षक सदाशिव गवळी, अमित घाडगे,  वैभव शिंदे, बाबासाहेब पाटील, डॉ. बुरगुटे तसेच इतर सामाजिक-राजकीय क्षेत्रातील व्यक्तींनीही मध्यस्थीत सहभाग घेतला.

दोन्ही पक्षांनी जुना राग बाजूला ठेवून पोलिसांसमोर एकमेकांना गळाभेट घेतली. त्यांनी यापुढे शांततेने, सलोख्याने आणि बंधुभावाने राहण्याची सहमती दर्शविली. तीन पिढ्यांचा संघर्ष संपवणाऱ्या या घटनेमुळे गावात सलोख्याचे वातावरण निर्माण झाले आहे.

पोलीस अधिकाऱ्यांच्या या पुढाकारामुळे केवळ कायदा-सुव्यवस्था राखण्यापलीकडे संवाद आणि मध्यस्थीतून सामाजिक शांतता प्रस्थापित करण्याची भूमिका अधोरेखित झाली.

KDM NEWS प्रतिनिधी