*सोलापूर : एसआयआर अंतर्गत प्रत्येक पात्र नागरिकाचा अंतिम मतदार यादीत समावेश होणार*

*सोलापूर : एसआयआर अंतर्गत प्रत्येक पात्र नागरिकाचा अंतिम मतदार यादीत समावेश होणार* 

*KDM NEWS प्रतिनिधी बार्शी*सोलापूर जिल्हाधिकारी एस. कार्तिकेयन यांनी स्पष्ट केले की, विशेष सखोल पुनरीक्षण (एसआयआर) कार्यक्रमांतर्गत जिल्ह्यातील एकही पात्र नागरिक मतदार यादीतून वगळला जाणार नाही. अंतिम मतदार यादी ४ नोव्हेंबर २०२६ रोजी प्रसिद्ध होईल आणि त्यात प्रत्येक पात्र नागरिकाचा समावेश असेल.

जिल्हाधिकारी कार्यालयात राजकीय पक्षांच्या प्रतिनिधींच्या बैठकीत कार्तिकेयन यांनी सांगितले की, १७ जून २०२६ रोजी जिल्ह्यातील एकूण मतदार संख्या ३९,४१,०९५ होती. ३१ ऑगस्ट २०२६ रोजी प्रसिद्ध झालेल्या प्रारूप मतदार यादीत ही संख्या ३३,१८,४२४ झाली आहे. यासोबत प्रसिद्ध झालेल्या एएसडीडी यादीत ६,२२,६७१ मतदारांचा समावेश आहे.

 *प्रारूप यादीतील आकडेवारी

- पुरुष मतदार : १७,०९,४७१  

- महिला मतदार : १६,०८,७०९  

- तृतीयपंथी मतदार : २४४  

   एएसडीडी यादीतील तपशील

- मृत्यू झालेले : १,७०,६९६  

- आधीच नोंद असलेले : १,०५,९४१  

- अनुपलब्ध/अनुपस्थित : १,३४,३०२  

- कायमस्वरूपी स्थलांतरित : २,१०,३९१  

- इतर कारणे : १,४०३  

३१ ऑगस्टच्या पडताळणीत ५,०९,०६७ मतदारांच्या नोंदींमध्ये विसंगती आढळली आहे. या प्रकरणांत आवश्यकतेनुसार फॉर्म ६, ७ आणि ८ बाबत नोटिसा देण्यात येणार आहेत.

**मतदान केंद्रांची वाढ**  

जिल्ह्यात यापूर्वी ३,७२३ मतदान केंद्रे होती. आता १७ नवीन केंद्रांसह एकूण संख्या ३,७४० झाली आहे. ३९ केंद्रे विलीन करण्यात आली असून २७ केंद्रांच्या ठिकाणांमध्ये बदल झाला आहे. सर्वाधिक बदल सोलापूर दक्षिण विधानसभा मतदारसंघात झाले आहेत (३ नवीन, ११ विलीन, ७ ठिकाण बदल).

**सुधारित वेळापत्रक**  

- गृहभेटी : ३० जून ते १७ ऑगस्ट २०२६  

- मतदान केंद्र सुसूत्रीकरण : २४ ऑगस्ट २०२६  

- प्रारूप यादी प्रसिद्धी : ३१ ऑगस्ट २०२६  

- दावे-हरकती मुदत : ३० सप्टेंबर २०२६  

- सुनावणी प्रक्रिया : २९ ऑक्टोबर २०२६ पर्यंत  

- अंतिम यादी प्रसिद्धी : ४ नोव्हेंबर २०२६  

राजकीय पक्षांच्या प्रतिनिधींनी उपजिल्हा निवडणूक कार्यालयातून प्रारूप यादी घेऊन जावी व विहित मुदतीत दावे-हरकती दाखल कराव्यात, असे आवाहन करण्यात आले. बैठकीत उपजिल्हा निवडणूक अधिकारी लक्ष्मण कसेकर उपस्थित होते.

KDM NEWS प्रतिनिधी