*बार्शीतील धानोरे येथे मुख्यमंत्र्यांकडून सोयाबीन पिकाची पाहणी; लवकरच मदतीचा ‘जीआर’ काढणार*

*बार्शीतील धानोरे येथे मुख्यमंत्र्यांकडून सोयाबीन पिकाची पाहणी; लवकरच मदतीचा ‘जीआर’ काढणार* 

*KDM NEWS प्रतिनिधी बार्शी*सोलापूर, २३ सप्टेंबर : सोलापूर जिल्ह्यातील दुष्काळसदृश परिस्थितीत शासन शेतकऱ्यांच्या पाठीशी खंबीरपणे उभे राहील आणि मदत थेट पोहोचविली जाईल, अशी ग्वाही मुख्यमंत्री देवेंद्र फडणवीस यांनी आज दिली. त्यांनी बार्शी तालुक्यातील धानोरे येथे नुकसानग्रस्त सोयाबीन पिकांची प्रत्यक्ष पाहणी केली आणि शेतकऱ्यांशी संवाद साधला.

जिल्ह्यात सरासरीच्या सुमारे ५० टक्केच पाऊस झाला आहे. खरीप हंगामातील जवळपास सर्व पिकांचे नुकसान झाले असून धानोरेसह बार्शी परिसरातील सुमारे ९० हजार हेक्टर सोयाबीनचे १०० टक्के नुकसान झाले आहे. मुख्यमंत्र्यांनी सांगितले की, दुष्काळीकडे शासन गांभीर्याने लक्ष देत आहे. शेतकऱ्यांना तातडीची मदत देण्यासाठी लवकरच शासन निर्णय (जीआर) काढण्यात येईल. पिण्याचे पाणी, जनावरांसाठी चारा, अन्नधान्य आणि विद्यार्थ्यांच्या शैक्षणिक शुल्काबाबतही निर्णय घेतला जाईल. रब्बी हंगामासाठी पाणी उपलब्ध झाल्यास त्या अनुषंगाने मदत केली जाईल.

उजनी धरणातील उपलब्ध पाणी पिण्यासाठी राखीव ठेवण्याबाबत कार्यवाही होईल. पालकमंत्री जयकुमार गोरे आणि आमदार राजेंद्र राऊत यांनी मांडलेल्या पाणी आणण्याच्या योजनेबाबत शासन सकारात्मक आहे. फ्लड डायव्हर्जन प्रकल्पाद्वारे उजनीत पाणी आणण्याचा प्रस्ताव सुरू आहे. याला जागतिक बँकेची मंजुरी मिळाली असून निविदा प्रक्रिया सुरू आहे. यामुळे सोलापूरसह धाराशिव, लातूर आणि बीड जिल्ह्यांनाही लाभ मिळेल.

यावेळी शेतकरी दमयंती गादेकर, संध्या गरड, वंदना गादेकर, राहुल पाटील यांसह अनेक शेतकऱ्यांनी पिकाच्या नुकसानीची व्यथा मांडली आणि त्वरित मदतीची मागणी केली. मुख्यमंत्र्यांनी त्यांना धीर देत शासन पाठीशी असल्याचे सांगितले. पालकमंत्री जयकुमार गोरे, जिल्हा परिषद अध्यक्ष दीपक वैद्य, आमदार राजेंद्र राऊत, सचिन कल्याणशेट्टी, समाधान आवताडे, जिल्हाधिकारी एस. कार्तिकेयन, मुख्य कार्यकारी अधिकारी कुशल जैन, पोलीस अधीक्षक अतुल कुलकर्णी आणि संबंधित अधिकारी उपस्थित होते.

KDM NEWS प्रतिनिधी