*बार्शीत शिक्षक मतदार यादीत बोगसगिरी; बनावट प्रमाणपत्रांच्या आधारे नाव नोंदवणाऱ्या ११ जणांवर गुन्हा दाखल*
*बार्शीत शिक्षक मतदार यादीत बोगसगिरी; बनावट प्रमाणपत्रांच्या आधारे नाव नोंदवणाऱ्या ११ जणांवर गुन्हा दाखल*
KDM NEWS प्रतिनिधी पुणे विभाग शिक्षक मतदारसंघाच्या आगामी निवडणुकीसाठी तयार केलेल्या मतदार यादीत शिक्षक नसलेल्या ११ व्यक्तींची नावे समाविष्ट झाल्याचा गंभीर प्रकार सोलापूर जिल्ह्यातील बार्शी येथे उघडकीस आला आहे. या प्रकरणी बार्शीचे गटशिक्षणाधिकारी गजानन बाजड यांच्या फिर्यादीवरून बार्शी शहर पोलीस ठाण्यात ११ जणांविरुद्ध गुन्हा दाखल करण्यात आला आहे.
जिल्हाधिकारी एस. कार्तिकेयन यांच्या आदेशानुसार प्रशासनाने पडताळणी केली. समाजमाध्यमांवरून आलेल्या संशयास्पद माहितीनंतर निवासी उपजिल्हाधिकारी अभिजीत पाटील यांच्या निर्देशानुसार गटशिक्षणाधिकारी बाजड यांनी संबंधित अर्जांची तपासणी सुरू केली. १७ ऑक्टोबर रोजी संबंधित शाळांकडे लेखी माहिती मागवण्यात आली.
**खोटी प्रमाणपत्रे सादर**
या व्यक्तींनी मतदार नोंदणीवेळी बार्शी तालुक्यातील ज्योतीबाची वाडी येथील छत्रपती शिवाजी विद्यालय आणि पंढरपूर तालुक्यातील पेहे येथील एम. जी. गुरुकुल येथे शिक्षक म्हणून कार्यरत असल्याची प्रमाणपत्रे सादर केली होती. प्रमाणपत्रांवर मुख्याध्यापकांच्या सह्या व शिक्के होते. मात्र शाळांकडून मिळालेल्या माहितीनुसार या व्यक्ती तेथे शिक्षक म्हणून कार्यरत नव्हत्या. त्यामुळे प्रमाणपत्रे बनावट असल्याचा संशय निर्माण झाला.
**११ संशयितांची नावे**
छत्रपती शिवाजी विद्यालय, ज्योतीबाची वाडी येथील तीन जण :
१. मोहन बाळासाहेब भोसले
२. अक्षय श्रीहरी चव्हाण
३. तुषार मोहन भोसले
एम. जी. गुरुकुल, पेहे येथील आठ जण :
४. स्वप्निल अंबरूषी कापसे
५. रोहित बाबासाहेब कापसे
६. पृथ्वीराज बाळासाहेब कापसे
७. शुक्राचार्य शाहुराजे बाबर
८. सुरज युवराज बाबर
९. सुदेश नवनाथ कापसे
१०. अभिजीत बापू डिसले
११. संतोषी किशोर धेंडे
**फॉरेन्सिक तपासणी सुरू**
प्रमाणपत्रांवरील सह्या व शिक्क्यांची सत्यता तपासण्यासाठी संबंधित कागदपत्रे, सह्यांचे नमुने व शिक्के फॉरेन्सिक प्रयोगशाळा तसेच हस्ताक्षरतज्ज्ञांकडे पाठवण्यात आले आहेत. प्रकरणाचा पुढील तपास वरिष्ठ पोलीस निरीक्षक गणेश कुंभार यांच्या मार्गदर्शनाखाली सुरू आहे.
शिक्षक मतदारसंघात मतदानाचा अधिकार मिळवण्यासाठी पात्रतेचे निकष पूर्ण करणे आवश्यक असते. शिक्षक नसलेल्या व्यक्तींची नावे यादीत समाविष्ट होणे गंभीर बाब आहे. प्रमाणपत्रे कोणी तयार केली, सह्या-शिक्के कोणी वापरले आणि अर्ज छाननीत त्रुटी कशा राहिल्या, याची सखोल चौकशी होणार आहे. दोष सिद्ध झाल्यास कायद्यानुसार कारवाई होईल. तपास पूर्ण होईपर्यंत कोणालाही दोषी ठरवणे योग्य ठरणार नाही.
ही घटना शिक्षक मतदार नोंदणी प्रक्रियेच्या पारदर्शकतेवर प्रश्नचिन्ह निर्माण करणारी आहे.
KDM NEWS प्रतिनिधी
टिप्पण्या