*सतेज पाटलांनी संघर्ष मोर्चांत बॉम्ब फोडला; शासन नियुक्त संचालकांची नावे जाहीर*

*सतेज पाटलांनी संघर्ष मोर्चांत बॉम्ब फोडला; शासन नियुक्त संचालकांची नावे जाहीर* 

KDM NEWS प्रतिनिधी कोल्हापूर : गोकुळ दूध संघाच्या अध्यक्षपदाच्या निवडणुकीनंतर शासनाने नियुक्त केलेल्या तज्ज्ञ संचालकांच्या नावांबाबत अखेर खुलासा झाला. सोमवारी (९ नोव्हेंबर) कोल्हापुरात झालेल्या संघर्ष मोर्चाला संबोधित करताना आमदार सतेज पाटील यांनी भाषणाच्या पहिल्या १०-११ मिनिटांतच मोठा गौप्यस्फोट केला. त्यांनी सरकारने आतापर्यंत गुप्त ठेवलेली शासन नियुक्त संचालकांची नावे थेट जाहीर केली.

सतेज पाटील यांनी सभेत वाचून दाखवलेल्या नावांनुसार, गोकुळवर शासन नियुक्त संचालक म्हणून **शिवाजी दिनकर आडनाईक, डॉ. प्रवीणचंद्र रंगनाथ हेंद्रे, कृष्णात पाटील** आणि **ॲड. प्रशांत भगवान पाटोळे** (सांगली) यांची नियुक्ती करण्यात आली आहे. सरकारने याबाबतचा जीआर अद्याप अधिकृतपणे अपलोड केलेला नाही, मात्र प्रशासनातील सूत्रांनी ही नावे कळवल्याचा दावा पाटील यांनी केला.

“सांगलीतील माणसाला गोकुळमध्ये संचालक कसे केले जाऊ शकते? संपूर्ण कोल्हापूर जिल्ह्यात एकही पात्र तज्ज्ञ, दूध उत्पादक किंवा योग्य व्यक्ती सरकारला मिळाली नाही का?” असा सवाल उपस्थित करत पाटील यांनी महायुती सरकारवर हल्लाबोल केला. त्यांनी या नियुक्त्यांना ‘गोकुळला अमूलच्या घशात घालण्याचा डाव’ म्हटले आणि सहकार कायदा पायदळी तुडवल्याचा आरोप केला.

गोकुळच्या निवडणुकीत २५ पैकी १३ जागा जिंकून बहुमत मिळवणाऱ्या राजर्षी शाहू शेतकरी समविचारी आघाडीचे नेतृत्व करणारे सतेज पाटील यांनी यापूर्वीही शासन नियुक्त संचालकांना मतदानाचा अधिकार देण्याच्या निर्णयाला विरोध केला होता. त्यांनी चंद्रकांत पाटील आणि हसन मुश्रीफ यांच्यावर थेट आरोप ठेवून हा निर्णय त्यांच्या षडयंत्रातून झाल्याचे सांगितले.

मोर्चात राजू शेट्टी, जयंत पाटील यांच्यासह अनेक नेत्यांनीही उपस्थिती दर्शवली. सतेज पाटील यांनी स्पष्ट केले की, ते कायदेशीर आणि रस्त्यावरील दोन्ही मार्गाने लढा चालू ठेवणार आहेत.

KDM NEWS प्रतिनिधी