*गोकुळ अध्यक्ष निवडणूक उद्या होणार; शासननियुक्त ४ सदस्यांची मते वेगळी ठेवण्याचे हायकोर्टाचे आदेश*

*गोकुळ अध्यक्ष निवडणूक उद्या होणार; शासननियुक्त ४ सदस्यांची मते वेगळी ठेवण्याचे हायकोर्टाचे आदेश* 

KDM NEWS प्रतिनिधी कोल्हापूर जिल्हा सहकारी दूध उत्पादक संघ (गोकुळ)च्या अध्यक्षपदाच्या निवडणुकीवरून निर्माण झालेल्या वादात मुंबई उच्च न्यायालयाच्या औरंगाबाद खंडपीठाने आज (९ नोव्हेंबर) महत्त्वपूर्ण आदेश दिले आहेत. तब्बल चार तास चाललेल्या सुनावणीनंतर न्यायालयाने निवडणूक उद्या (१० नोव्हेंबर) ठरल्याप्रमाणे पार पाडण्याचे मार्ग मोकळे केले आहेत. मात्र काही अटींमुळे अध्यक्षपदाबाबत अद्याप सस्पेन्स कायम आहे.

गोकुळच्या संचालक मंडळात समविचारी आघाडीचे १३ आणि महायुतीचे १२ संचालक निवडून आले आहेत. कोरम नसल्यामुळे यापूर्वी अध्यक्ष निवड होऊ शकली नव्हती. त्यानंतर राज्य सरकारने ५०० कोटींपेक्षा जास्त उलाढाल असलेल्या सहकारी संस्थांमध्ये शासननियुक्त संचालकांना मतदानाचा अधिकार देणारा अध्यादेश काढला. या अध्यादेशाला समविचारी आघाडीने आव्हान दिले होते.

औरंगाबाद खंडपीठाने आज अध्यादेशाला स्थगिती देण्याची मागणी फेटाळली. न्यायालयाने स्पष्ट केले की, उद्या होणाऱ्या निवडणुकीत निवडून आलेल्या २५ संचालकांबरोबर शासनाने नियुक्त केलेले ४ सदस्यही मतदान करतील. मात्र या चार सदस्यांची मते वेगळी ठेवली जातील. संपूर्ण प्रक्रियेची व्हिडिओग्राफी करण्यात येईल. निकाल जाहीर करून अध्यक्ष निवडला जाईल.

या प्रकरणाची पुढील सुनावणी २५ नोव्हेंबर रोजी होणार आहे. तोपर्यंत संपूर्ण निवडणूक प्रक्रिया अंतिम निकालाच्या अधीन राहील, असेही न्यायालयाने स्पष्ट केले आहे. अध्यादेश कायदेशीर आहे की नाही, हे अद्याप ठरलेले नाही.

या आदेशामुळे उद्या निवडणूक होईल हे निश्चित झाले असले तरी शासननियुक्त सदस्यांच्या मतांचा अंतिम निकाल कसा लागेल, याबाबत अनिश्चितता कायम आहे. चार तासांच्या या उच्च-दाबाच्या सुनावणीत दोन्ही बाजूंनी जोरदार युक्तिवाद झाला.

KDM NEWS प्रतिनिधी